Joëlle Flückiger: Third week travelling in New Zealand

Mir sind am 21. Dezember 2010 ca. am 8i am Morge uf dä Südinsle z’Picton mit dä Fähri acho und händ doch grad mal ziemlich übermüädät ä Wytour z’Blenheim buechet… Sisch sehr glatt und gnussvoll gsi, drum sind mir am 17 Uhr bereits völlig erschöpft im Bett glägä… :-) Am nöchstä Tag sind mir is super schöne Städtli Nelson gfahre und händ det campet. Nachme schöne Namittag in Marahau sind mir am 24. Dezember mitm AquaTaxi bis Totaranui im Able Tasman National Park gfahre. z’Erst sind mir wiiter in Norde zume wunderschöne Beach gwanderät und händ nacher üsn Marsch zum Awaroa Camp in Agriff gnoh. Ziemlich schwär beladä (Zält, Gas Chocher, Pfanne, Ässä, Kleider…) händ mir d’Schlusspassage überquert, wo üs sehr viel Chräbsli und Muschle begägnät sind. s’Hät im ganze Park oft Passagene wo vo Ebbe und Fluet abhängig sind. Mitmä chline Champagner und Cherzli händ mir Heilig Abig gfiiret und sind spöter mit paarne vode Hut näbät dra ums Füür gsässä. Am 25. sind mir frühe wiiter zoge bis zum Bark Bay Camp. Üs häts det sehr guet gfalle, da d’Campinginsle amä super schöne Beach isch. Mitärä Sandburg und Cherzli händ mir Wiehnachte wunderbar chönä am Strand gnüsse. Dä letscht Tag im Able Tasman National Park isch eher happig gsi, aber au wunderschön. Mir sind am Morge am 8i gstartet und sind nachm 15 Uhr z’Marahau acho. s’Isch ä genials Erläbnis gsi zum Wiehnachte zmitzt idä Natur usse ohni Natel und nüt fiire!