Joëlle Flückiger: First week in Thailand

Üsi Zyt zThailand hät im Norde zChiang Mai gstartät. Diä Stadt isch sehr lebändig. Wämä dur dStrassä lauft begägnät mä diversä Grüch und immer wieder gewaltignä Tämpel. sHät sehr viel Töff und Roller da und au viel Autos und TukTuk’s (3-rädrigi Taxis). dLuft isch dur diä vielä Abgasä rächt dick idä Stadt. Jedä Tag findät dä Night Bazar statt wo X Ständ dStrasse umramed, natürli hani det au so dies und jenes mössä poste.. :-) sHät so viel schönä Schmuck und alles isch im Verhältnis zu üs soo gnünstig. Mir händ ä Tagestour nach Chiang Rai buechet und händ dä mega idrücklich White Temple besichtigät, dGrenze zu Burma bsuächt und sind mitmä Schiff bim Golden Triangle (wo Burma, Laos und Thailand zämä chömäd) für än churze Ufenthalt nach Laos gfahre. Uf dä Fahrt ganz in Nordä hät mä immer wieder Arbeiter uf Riisfälder gseh schaffä. Üsi zweitägig Jungel-Tour im Huai Nam Dang Nationalpark hät mir mega gfalle! sIsch zerscht mitm Auto am Mokfa Wasserfall und dänn paar Stund zFuäss dur dä Jungel bi Karen-Dörfer verbi gange. sGit im Norde vo Thailand immer no richtigi wildi Stämm, wo sich sälber versorgäd. Sie händ zwar Töff und mit dänä fahräd sie ab und zuä quär dur dä Jungel id Stadt, aber suscht läbäd sie natur pur. Sehr spannend gsi zum ei Nacht i some Dorf übernachte. Dä zweit Tag isch no besser gsi! Mir sind mit Elefante ei Stund dä Fluss durab grittä und aschlüssend mit Bambus Floss über zwei Stund bis a üses Ziel gströmt. Nach däm super schönä und spannende Ufenthalt im Nordä sind mir am Fritig in Südä gflogä, händ ei Nacht zPhuket verbracht und sind am Samstig mit dä Fähri nach Ko Phi Phi. Da sind mir mitärä Bootstour rund um dInslene gfahre. Eifach sooooo schön da...